टीकापुर, मंसिर ४

कैलालीको लम्कीमा एक युवकमाथि खुकुरी प्रहार भएको छ । लम्कीचुहा नगरपालिका वडा नं. ४ कौवापुर पिपलचौताराका २१ वर्षीय निसान थापामगर माथि धारिलो हतियार खुकुरी प्रहार भएको हो ।

जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) कुलदिप चन्दले थापामगरमाथि खुकुरी प्रहार भएको बताउँदै घटनामा संलग्न लम्कीकै २२ वर्षीय अमित मयालको समूह(ग्याङ) रहेको जानकारी दिए ।

उनीहरुले थापामगरमाथि पछाडिबाट खुकुरी प्रहार गरेको बताउदै डीएसपी चन्दले बाँया हातको औला काटिएको र दाँया काँधमा समान्य चोट रहेको बताए ।

उनको लम्कीकै लालरत्न अस्पतालमा उपचार भइरहेको छ । खुकुरी प्रहार गर्ने मयाल समूह फरार रहेको र उनीहरुको खोजी भइरहेको प्रहरीले जनाएको छ ।