बर्दिया, कात्तिक १७
बर्दियाको मधुवनमा बाघको आक्रमणबाट आज एक महिलाको मृत्यु भएको छ । मधुवन नगरपालिका वडा नम्बर ५ शक्तिपुरकी २८ वर्षिया सिर्जना भन्ने गायत्री डाँगीको बाघको आक्रमणबाट मृत्यु भएको प्रहरीले जानकारी दिएको छ ।

चिरौटे सामुदायिक वनमा बाख्रा चराउन गएको बेला उनलाई बाघले आक्रमण गरेको जिल्ला प्रहरी कार्यालय बर्दियाका प्रमुख प्रहरी उपरिक्षक सुधिरराज शाहीले जानकारी दिएका छन ।

‘सामुदायिक वनमा बाख्रा चराउन गएर बेपत्ता भएको दिउँसो साढे २ बजे खबर प्राप्त भयो’ उनले भने, ‘खबर प्राप्त हुने बित्तिकै खोजतलास सुरु गरिएको थियो।’

प्रहरीका अनुसार दिउँसो साढे ३ बजे महिलाको शव फेला परेको हो । पोस्टमार्टमको लागि अहिले महिलाको शव बर्दिया अस्पतालमा राखिएको छ ।