टीकापुर, साउन ११

टीकापुरस्थित रेडक्रस सोसाईटीद्वारा सञ्चालित दन्त चिकित्सालयमा गरेको लगानी बालुवामा पानी जस्तै भएको छ । चिकित्सालयमा झण्डै दुई वर्षको अवधिमा करिव ४५ जनाले मात्रै उपचार सेवा लिएका छन ।

चिकित्सालय स्थापनामा ११ लाख रुपैयाँ खर्च गरिएको छ । जसमध्ये टीकापुर नगरपालिकाले अनुदान स्वरुप सात लाख दिएको थियो भने बाँकी रकम रेडक्रस आफैले ब्यहोरेको बताईएको छ । सेवाग्राही नै नआएपछि चिकित्सालयमा गरेको लगानी खेर गएको छ ।

टीकापुरबासीलाई स्तरीय दन्त सेवा दिने भन्दै निकै तामझामका साथ सुरु गरिएको चिकित्सालय हाल बन्द अवस्थामा पुगेको छ । त्यहाँ कार्यरत दन्त चिकित्सक डा. सन्तोष पण्डित छोडेर गएको तीन महिना भैसक्यो । चिकित्सक नै नभएपछि चिकित्सालय बन्द गर्नुपरेको बताईएको छ ।

चिकित्सालय सञ्चालन भएको ठाउँलाई रेडक्रसले स्टोर रुम बनाएको छ । चिकित्सालयमा जडान भएका उपकरणहरु त्यत्तिकै थन्किएका छन । रेडक्रस सोसाइटी टीकापुरका सभापति दत्तबहादुर बिष्टले यस बारेमा आफूलाई विस्तृत जानकारी नभएको प्रतिक्रिया दिए । उनले अघिल्लो कार्यकालमै चिकित्सालय स्थापना भएको बताए ।

चिकित्सालय स्थापना गर्नमा निवर्तमान सभापति जगदीश्वर पण्डितको अग्रणी भूमिका देखिन्छ । उनकै पालामा २०७८ असोज २१ गते चिकित्सालयले सेवा सुरु गरेको हो ।

रेडक्रस भवनसँगैको टीकापुर अस्पताल र टीकापुर बजारमा समेत केही निजी स्तरका दन्त सेवा प्रदान गर्दै आएका क्लिनिक हुँदाहुँदै रेडक्रसले यही सेवा सञ्चालनमा किन ल्याउनु पर्यो भन्ने कुरा महत्वपूर्ण छ । स्थानीयले केही व्यक्तिको कमिसनका कारण रेडक्रसले दन्त सेवा सञ्चालन गरेको आरोप लगाउने गरेका छन ।

‘टीकापुर अस्पतालमा त्यस्तो राम्रो सेवा छ । निजीस्तरका क्लिनिक पनि छन’ एक जना स्थानीयले भने –‘यस्तो अवस्थामा लाखौं खर्चेर रेडक्रसले किन दन्त सेवा सुरु गर्नु परेको हो । बुझ्न सकिएन ।’

निवर्तमान सभापति पण्डितले टीकापुर अस्पतालमा स्वास्थ्य बीमा कार्यक्रम लागु भएपछि रेडक्रसको दन्त सेवा प्रभावित भएको जिकिर गरे । उनले सहुलियत दरमा स्वास्थ्य सेवा दिने उद्देश्यले दन्त चिकित्सालय सञ्चालन गरेको दावी गरे ।

‘अस्पतालमा १० देखी २ बजेसम्म मात्रै सेवा छ’ उनले भने –‘त्यस अघिपछिको समयमा सेवा दिने उद्देश्यले चिकित्सालय सुरु गरेका हौं ।’

तर उनले दावी गरे अनुसार चिकित्सालयमा उपचार गर्न आउने बिरामीको चाप कहिल्यै देखिएन । अहिलेसम्म उपचार गरेका बिरामीको संख्या हेर्दा महिनामा २ जनाका दरले उपचार गरेको समेत देखिदैन ।

त्यो पनि चिकित्सालय उद्घाटनका दिन मात्रै १६ जनाले दाँत जाँच गरेका थिए । यो सहित ४५ जनाले मात्रै उपचार गरेको चिकित्सालयको रेकर्डमा उल्लेख छ ।