टीकापुर, असार ५
जिप दुर्घटनामा परी घाइते भएका सुदूरपश्चिम प्रदेश सरकारका आन्तरिक मामिला मन्त्री पृथ्वीबहादुर सिंहको निधन भएको छ । दुर्घटनामा परी गम्भीर घाइते भएका सिंहको नेपालगञ्ज मेडिकल कलेज कोहलपुरमा उपचारका क्रममा साँझ ५ः३३ बजे निधन भएको हो ।
नेपाल प्रहरीका सुदूरपश्चिम प्रहरी प्रमुख डिआईजी भरत बोहराले मन्त्री सिंहको उपचारका क्रममा कोहलपुरमा निधन भएको हाम्रोपत्रलाई जानकारी दिएका छन् ।
दुर्घटनामा परी मन्त्री सिंहकी श्रीमती अमृता सिंह र उनकी भाउजु जयादेवी सिंहको घटनास्थलमै निधन भएको थियो । मन्त्री सिंहसहित घाइते थप दुई जनालाई उपचारका लागि हेलिकप्टरबाट कोहलपुर पुर्याइएको थियो ।
डिआईजी बोहराका अनुसार घटनामा मन्त्रीका पीएसओ सहायक प्रहरी हवल्दार दीपक भण्डारी र गाडी चालक धर्मराज जोशीको कोहलपुरमा उपचार भइरहेको छ ।
सुदूरपश्चिम सरकारका मन्त्री सिंह चढेको गाडी सुपप्र ०१००१ झ ४८० नम्बरको गाडी डडेलधुराबाट चैनपुर आउने क्रममा मंगलबार दिउँसो दुई बजेतिर केदारस्युँ गाउँपालिकाको धारछडा भन्ने ठाउँमा सडकबाट अन्दाजी ५० मिटर तल कालंगा खोला किनारमा खसेको थियो ।
