टीकापुर, जेठ १५
टीकापुर सामुदायिक पुस्तकालयले प्रदान गर्ने उत्कृष्ठ पाठक सम्मान पुरस्कारबाट आरती उपाध्याय पुरस्कृत भएकी छन् । पुस्तकालयले बैशाख महिनाका लागि उत्कृष्ठ पाठक पुरस्कार टीकापुर नगरपालिका वडा नं. १ ब्लक नं. १७ की उपाध्यायलाई प्रदान गरेको हो ।
टीकापुर सरोकार समूहको आर्थिक सहयोगमा विगत छ महिनादेखि पठन संस्कृतिको विकास गर्नका लागि पुस्तकालयले नियमित पठनपाठन गर्ने पाठकलाई उत्कृष्ठ पाठकको रुपमा १० हजार नगद पुरस्कारसहित प्रमाणपत्र प्रदान गरिँदै आएको छ ।
स्थानीय खड्ग स्मृति माध्यमिक विद्यालयबाट हालै एसइई परीक्षा दिएकी उपाध्यायले फुर्सदको समयमा पुस्तकालयमा आएर पढ्दा पुरस्कार पाएकोमा खुशी व्यक्त गरिन् ।
टीकापुर सामुदायिक पुस्तकालयका पूर्वअध्यक्ष उदयराम अधिकारी र लिलादेवी उपाध्यायले संयुक्त रुपमा उपाध्यायलाई उक्त पुरस्कार प्रदान गरिएको हो ।
पुस्तकालयका अध्यक्ष ताराप्रसाद जोशीको अध्यक्षतामा भएको कार्यक्रमका लागि बैशाख महिनाको पुरस्कार टीकापुर सरोकार समूहका सचिव नवराज भट्टराईले सौजन्य गरेका हुन् । भट्टराईले आफ्ना स्वर्गीय पिता पिताम्बर उपाध्यायको स्मृतिमा पुरस्कार सौजन्य गरेका हुन् ।
पुस्तकालयका सचिव देबेन्द्र शाहका अनुसार पठन संस्कृतिलाई प्रोत्साहन गर्न शुरु गरिएको पुरस्कार कार्यक्रमका कारण पुस्तकालयमा आएर अध्ययन गर्ने बालबालिकाको संख्या बढ्दै गएको छ । बैशाख महिनामा १ शय १५ जना अध्ययनका लागि पुस्तकालयमा आएका थिए ।
