टीकापुर, २० चैत 

‘दिगो विकास लक्ष्य प्राप्तीका लागि सहकारी’ भन्ने नाराका साथ आज टीकापुरमा समेत ६२ औं राष्ट्रिय सहकारी दिवस मनाईएको छ । टीकापुर नगरपालिका सहकारी संघको अगुवाईमा राष्ट्रिय सहकारी दिवस मनाईएको हो । दिवसका अवसरमा टीकापुर अस्पतालका बिरामीहरुलाई फलफूल र जुस वितरण गरिएको थियो । त्यस्तै प्रभातफेरीको आयोजना पश्चात टीकापुर नगरपालिकामा सभाको आयोजना समेत गरिएको थियो ।

संघका अध्यक्ष बद्रीप्रसाद भट्टराईको सभापतित्वमा भएको सभामा टीकापुर नगरपालिकाका मेयर तपेन्द्रबहादुर रावल प्रमुख अतिथि र उपमेयर केशरी रावल बिष्ट विशिष्ट अतिथि रहेका थिए । सभामा वडा नं. १ का वडाध्यक्ष गंगाराम आचार्य, धनसिँह साउँद, प्रेमप्रसाद भट्टराई, कला बिष्ट, नैनसिँह बम लगायतले बोलेका थिए । सो कार्यक्रममा टीकापुर नगरपालिकामा रहेका सबै सहकारीको सहभागिता रहेको थियो । दिवस मनाउन टीकापुर नगरपालिकाले सहयोग गरेको थियो ।

त्यस्तै दिवसकै अवसरमा जिल्ला बचत तथा ऋण सहकारी संघ कैलालीले बर्दगोरीया गाउँपालिकास्थित सहारा घरलाई खाद्यान्न सहयोग गरेको छ । सहारा घरमा सडक जीवन बिताईरहेका ४० जनालाई स्थानीय बलबहादुर बिष्टले पाल्दै आएका छन । संघका अध्यक्ष शिवा थापाको अगुवाईमा खाद्यान्न वितरण कार्यक्रम सम्पन्न भएको थियो । संघले चामल, दाल, तेल लगायत खाद्यान्न सामाग्री सहयोग गरेको छ ।