टीकापुर, साउन १२
राष्ट्रपति रनिङशिल्ड प्रतियोगितामा टीकापुरबाट सहभागी विजेता खेलाडी र खेल प्रशिक्षक आज सम्मानित भएका छन । उनीहरुलाई नेपाली काँग्रेस कैलाली क्षेत्र नं. १ ले एक समारोहकाबीच सम्मान गरेको हो ।

सम्मानित हुनेमा खेलाडीहरु केशर मास्के, सीमा चौधरी, एकेन्द्र विक र खेल प्रशिक्षक अर्जुन ठकुल्ला रहेका छन । काठमाण्डौंमा सम्पन्न प्रतियोगितामा खेलाडीहरु मध्ये मास्केले १५ सय र ३ हजार मिटर तथा चौधरीले १५ सय र ८ सय मिटर दौडमा सुदूरपश्चिमलाई २/२ वटा स्वर्ण पदक दिलाएका थिए । उनीहरुलाई जनही ६ हजार रुपैयाँ, दोसल्ला र प्रमाणपत्रद्वारा सम्मान गरिएको थियो । त्यसैगरी विकले १५ सय मिटर दौडमा दोस्रो स्थान हासिल गरेका थिए । उनलाई ४ हजार ५ सय, दोसल्ला र प्रमाणपत्रद्वारा सम्मान गरिएको छ ।

त्यस्तै विगत लामो समयदेखी खेल प्रशिक्षकका रुपमा कार्यरत ठकुल्लालाई समेत टीकापुरको खेलकुदका क्षेत्रमा महत्वपूर्ण योगदान पु¥याएको भन्दै सम्मान गरिएको छ । उनी स्थानीय बीरेन्द्र विद्या मन्दिर माविका खेल शिक्षक समेत हुन । उनी एथ्लेटिक्स र भलिवलको खेलाडी हुँदै हाल सेपाक ताक्रो खेलको अन्तर्राष्ट्रिय प्रशिक्षक हुन ।

खेलाडी र खेल प्रशिक्षकलाई सुदूरपश्चिम प्रदेश सरकार विपक्षी दलका नेता डा. रणबहादुर रावलले एक समारोहकाबीच सम्मान गरेका छन । सम्मान कार्यक्रमका प्रमुख अतिथि रहेका रावलले खेलाडी देशको गहना भएको बताए ।

क्षेत्रीय सभापति भुवनेश्वर अधिकारीको सभापतित्वमा भएको कार्यक्रममा विभिन्न व्यक्तिहरुले खेलाडी र खेल प्रशिक्षकलाई शुभकामना व्यक्त गरेका थिए ।