टीकापुर, जेठ २२
नगरबासीलाई स्वास्थ्य प्रति जिम्मेवार बनाउनुका साथै स्वस्थ जीवनशैली अपनाउन प्रेरित गर्ने उद्देश्यले टीकापुर नगरपालिकाले ‘म स्वस्थ ः मेरो नगर स्वस्थ’ अभियान सुरु गरेको छ ।

बुधवार सञ्चारकर्मीसँग स्वास्थ्य विषयक कार्यक्रम गरी नगरपालिकाले सबैलाई अभियान सफल पार्न आग्रह गरेको छ । सोही अवसरमा अभियान अन्र्तगत नगरपालिकाले सहभागीहरुलाई प्रतिवद्धता व्यक्त गर्न लगाएको छ । सहभागी सबैले आफू स्वस्थ रहने प्रतिवद्धता व्यक्त गरेका छन ।

नगरपालिकाले सुरु गरेको अभियानले विश्व स्वास्थ्य संगठनको ६५ औं महासभामा सदस्य राष्ट्रहरुले नसर्ने रोग सन् २०२५ सम्ममा २५ प्रतिशत घटाउने लक्ष्यलाई सघाउने स्वास्थ्य शाखा प्रमुख बलबहादुर रावलले बताए ।

सरकारले मुख्यगरी ४ वटा नसर्ने रोगलाई अनुमोदन गरेको छ । जसमध्ये मुटु तथा रक्तनली, मधुमेह (सुगर), दम र क्यान्सर रहेका छन । क्यान्सर मध्ये महिलाहरुको पाठेघर र स्तन क्यान्सरलाई सरकारले प्रमुख नसर्ने रोग मध्ये राखेको छ ।

विश्व स्वास्थ्य संगठनका अनुसार असन्तुलित खानपान र ब्यायाम नगर्नाले नसर्ने रोगको प्रभाव बढ्दै गएको जनाएको छ । संगठनका अनुसार वर्षेनी ४ करोड १० लाख व्यक्ति नसर्ने रोगका कारण मर्ने गरेका छन । जसमध्ये १ करोड ७९ लाख मुटु तथा रक्तनली, ९० लाख क्यान्सर, ३९ लाख स्वासप्रश्वास र १६ लाख मधुमेहका बिरामी रहेका विश्व स्वास्थ्य संगठनमा कार्यरत डा. अनुप बिसीले जानकारी दिए ।

नेपालमा समेत कुल मृत्युदर मध्ये ३० प्रतिशत मुटु तथा रक्तनलीको समस्याबाट मर्ने गरेको बताईन्छ । जसमध्ये ३१ प्रतिशत पुरुष र २१ प्रतिशत महिला रहेको डा. बिसीले जानकारी दिए । त्यस्तै कुल मृत्युदरको ४ प्रतिशत मधुमेह, १० प्रतिशत दम र ९ प्रतिशत क्यान्सरका बिरामीले वर्षेनी ज्यान गुमाउने गरेका छन ।