टीकापुर, भदौ २७

कैलालीको मध्यवर्ती घोडाघोडी नगरपालिकाको सुख्खडमा सामुहिक बलात्कारको शिकार भएकी १५ वर्षीया किशोरीलाई उनकै चिनजानका साथीले बियर ख्वाएर सामुहिक बलात्कार गरेको खुलासा भएको छ ।

भदौ २१ गते राति चिनजानका साथीहरुले खाजा खान होटलमा लगेर बियर खुवाई सामुहिक बलात्कार गरेको खुलासा भएको हो ।

जिल्ला प्रहरी कार्यालय कैलालीका प्रवक्ता डिएसपी बेदप्रकाश जोशीका अनुसार गौरा पर्वको अवसरमा आयोजित देउडा हेर्न गएकी ती किशोरीलाई खाजा खान जाऊ भन्दै होटलमा लगेर बियर खुवाएर सामुहिक बलात्कार गरेका थिए ।

किशोरीले प्रहरीलाई दिएको जाहेरीका आधारमा प्रहरीले सामूहिक बलात्कारको आरोपमा घोडाघोडी नगरपालिका वडा नं. १ का १८ वर्षीय हिमाल सापकोटा, २० वर्षीय एसु सापकोटा र घोडाघोडी नगरपालिका वडा नं. २ बस्ने १८ वर्षीय बसन्त बिष्टलाई पक्राउ गरेको छ ।

प्रहरीका अुनसार घटनामा संलग्न रहेका एक जना आरोपी फरार छन् । उनीहरुलाई इलाका प्रहरी कार्यालय सुखडले नियन्त्रणमा लिएर अनुसन्धान गरिरहेको छ ।

देउडा हेर्ने ठाउँमा भेटिएका मध्ये दुई जना पीडित किशोरीसँग पूर्व चिनजानका भएको प्रहरी अनुसन्धानबाट खुलेको छ ।

प्रहरीमा दिएको जाहेरी अनुसार देउडा हेरिरहेका बेला चिनजानकै एकजनाले पीडित किशोरीलाई अर्की एक साथीसँगै होटलमा खाजा खाना भनेर लिएका थिए । खाजा खाने बेला ती किशोरीलाई बियर खुवाइएको थियो । आफ्नो घर नजिकै पुगेपछि किशोरीकी साथी छुटिएर घर हिँडेकी   थिइन् ।

प्रहरीका अनुसार घर नजिकै छोडेर उनकी साथी आफ्नो बाटो लागेपछि पिछा गर्दै पुगेका एक जनाले राति भइसकेकाले आफ्नै घरमा बस्न कर गरेका थिए ।

ती किशोरको आग्रह स्वीकार गर्दै ती किशोरी युवकको घरमा गएकी थिइन् । किशोरीलाई बाहिरबाट ढोका थुनेर अरु तीन जना साथीहरु बोलाएर पालैपालो बलात्कार गरेको पीडितले जाहेरीमा उल्लेख गरेको प्रहरीले जनाएको छ ।

आत्महत्याको प्रयास

डीएसपी जोशीका अनुसार ति किशोरीले भोलिपल्ट साथीलाई घटनाबारे बताएकी थिइन् । उनकी साथीले प्रहरीमा उजुरी गर्न आग्रह गरे पनि बदनाम हुने भन्दै भदौ २३ गते आत्महत्या गर्न स्यानिटाइजर पिएकी थिइन् ।

स्यानिटाइजर पिएर बाटोमा बेहोस् अवस्थामा भेटिएकी उनलाई सुख्खड प्रहरीले उपचारका लागि घोडाघोडी अस्पताल पुगाएपछि घटना बाहिरिएको हो ।

किशोरीले आत्महत्या गर्ने प्रयास गरेपछि उनका अभिभावकले प्रहरीमा उजुरी दिएका थिए । अस्पतालमा उपचारपछि उनको होस् खुल्दा उनले आफूमाथि घटेको घटनाबारे बताएकी थिइन् ।

त्यसपछि चार जनाले सामूहिक रूपमा बलात्कार गरेको भन्दै ती किशोरीका तर्फबाट इलाका प्रहरी कार्यालय सुख्खडमा भदौ २३ गते नै जाहेरी दर्ता भएको थियो । आरोप लागेका चार जनामध्ये तीन जनालाई प्रहरीले २४ गते नै पक्राउ गरिसकेको छ ।

पक्राउ परेका माथि थप अनुसन्धान भइरहेको इलाका प्रहरी कार्यालय सुख्खडका प्रमुख डिएसपी लक्ष्मण शाहीले बताए ।