धनगढी, जेठ ४
महिलालाई जंगलमा लगेर बलात्कार प्रयास गरेको आरोपमा प्रहरीले एक व्यक्तिलाई पक्राउ गरेको छ । जिल्ला प्रहरी कार्यालय कैलालीका अनुसार पक्राउ पर्नेमा कैलारी गाउँपालिका–८ लोहरपुरका मनिष चौधरी (२४) रहेका छन ।

उनले गत फागुन १८ गते दिउसो १ बजेतिर ती महिलालाई मसुरीया र कनरीबीचको जंगलमा लगेर बलात्कारको प्रयास गरेको प्रहरीले जनाएको छ । प्रहरीका अनुसार चौधरीले महिलालाई चक्कु देखाएर नाङ्गो पारी आफ्नो बेल्टले घाँटीमा बाँधेर जबरजस्ती बलात्कार गर्न खोजेका थिए ।

महिलाले आफूसँग भएको पर्समा पैसा छ भनेपछि चौधरी केही टाढा रहेको साइकलमा राखिएको पर्स लिन गएको बेला महिला उम्किएर भागेकी थिईन । चौधरीले महिला भागेपछि उनको पर्स र मोवाइल लगेका थिए । सोही मोवाइलका आधारमा चौधरी पक्राउ परेको जिल्ला प्रहरी कार्यालय कैलालीका डिएसपी दक्षकुमार बस्नेतले जानकारी दिए ।

प्रहरीले पक्राउ परेका चौधरीको साथबाट महिलाको हुवाई कम्पनीको मोवाइल बरामद भएको जानकारी दिएको छ । चौधरी गएराति धनगढी उपमहानगरपालिका–७ मनेहरा शिविरबाट पक्राउ परेका हुन ।