टीकापुर, असार २३
कैलालीको घोडाघोडी नगरपालिका कार्यपालिकाको कार्यालयमा हतियार सहित प्रवेश गरेर कर्मचारीलाई धम्काउने विरुद्ध विभिन्न सात राजनीतिक दलले कारवाहीको माग गरेका छन ।

राजनीतिक दलहरुले आज एक प्रेस विज्ञप्ती जारी गर्दै घटनामा संलग्नलाई कडा कारवाही गरेर जनप्रतिनिधि र कर्मचारीहरुलाई काम गर्ने वातावरण बनाउन प्रशासनसँग माग गरेका छन ।

विज्ञप्तीमा हिजो साँझ ६ः५४ बजेको समयमा हातहतियार सहित मोटरसाइकलमा आएका अज्ञात व्यक्तिहरुले कर्मचारीहरुलाई गालीगलौज गर्नुका साथै ज्यान मार्ने धम्की दिएको उल्लेख छ ।

प्रमुख र उपप्रमुख कार्यकक्षमै रहेको अवस्थामा कार्यालय भित्र यस्तो घटना भएको प्रति राजनीतिक दलहरुले गम्भीर ध्यानाकर्षण भएको जनाएका छन । उनीहरुले घटनामा प्रत्यक्ष वा अप्रत्यक्ष रुपमा जोडिएका जोसुकैलाई कारवाही गर्न माग गरेका छन ।

विज्ञप्ती जारी गर्नेमा नेकपा एमाले, नेपाली काँग्रेस, नेकपा माओवादी केन्द्र, नेकपा एकिकृत समाजवादी, राष्ट्रिय प्रजातन्त्र पार्टी, राष्ट्रिय जनमोर्चा र नागरिक उन्मुक्ति पार्टी रहेका छन ।